Qəzetimizin 21 may 1992-ci il tarixli 15-ci sayında dərc etdiyimiz “Saxtakarlıq və yaxud “imza toplamaq əməliyyatı” məqaləsi oxucular arasında geniş əks-səda və maraq doğurmuşdur. Hətta Şəkidə çıxan “İpəkçi” qəzetinin 26 iyun 1992-ci il tarixli 16-cı sayında “Redaktordan” rubrikası altında dərc olunmuş “Uğur olsun Milli Məclis sədri” yazısında da müəllif bu məqaləyə münasibətini bildirmiş və məqaləsini bu yazıya istinad edərək faktlarla zənginləşdirmişdir. Yazıda qəzetimizlə bağlı bir abzası oxucularımızın nəzərinə çatdırırıq.

El gözü tərəzidir. Bu gün İlyas İsmayılov vaxtı ilə bəyənmədiyi ədliyyə naziri vəzifəsini tutsa da, prezident seçkilərində İsmayılovun payına düşən səslərin nəticəsi (təkrar üçün üzr istəyirik: cəmi 0,7 faiz, yaxud vur-tut 20216 nəfər) göstərir ki, bu “uğur” keçmiş baş prokurorun – indiki nazirin xalq qarşısında nüfuzunu göstərən sarsıdıcı bir meyardır – bundan sonra sabiq baş prokurorun özünü reklam etmək üçün göstərəcəyi cəhdlərin heç bir uğur qazanmayacağı şübhəsizdir. Saxtakarlığın daha bir nümunəsi: Yevlaxda çıxan “Nicat” qəzetinin 21 may 1992-ci il tarixli nömrəsindən bizə məlum oldu ki, “28 aprel” sovxozunda prezident seçkiləri ilə əlaqədar imza toplamaq “əməliyyatında” yeni iş üsuluna əl atılmış, Naxçıvan Ali Məclisinin sədri Heydər Əliyevin adı altında keçmiş prokurora, yaxınlarda isə Ədliyyə naziri təyin edilmiş prezidentliyə namizəd İlyas İsmayılova imza toplamışlar. Nə yaxşı ki, bu dünyada Heydər Əliyev kimi kişilər də var imiş: “Qoçaq” hüquq işçisi Heydər müəllimi bəyənməsə də, onun adından istifadə edib, özünə “xal” toplamağa cəhd göstərmişdir.

“Nicat”ın ƏLAVƏSİ: həyata yenicə göz açmış qəzetimizin respublkianın qocaman mətbu orqanlarından olan “İpəkçi”nin, onun hörmətli redaktoru, məşhur publisist Salis müəllimin diqqətini cəlb etməsi bizi hədsiz sevindirir. Yaxşı bilirik ki, bu yaxınlarda 60 illik yubileyini qeyd edəcəyimiz “İpəkçi” adi bir müəssisə qəzeti olsa da keçmiş SSRİ-də, o cümlədən respublikamızda təkhakimiy- yətliyin tüğyan etdiyi dövrlərdə belə həmişə cəsarətliliyi, demokratikliyi, təşəbbüskarlığı, azad fikirliyi, obyektivliyi ilə fərqlənmiş, təkcə Şəki camaatının deyil, bütün respublika oxucularının hörmətini qazanmışdır.

“İpəkçi”dən olan həmkarlarımıza, qəzetin hörmətli redaktoru Salis müəllimə onu demək  istəyirik ik, həyata “Ya olduğun kimi görün, ya göründüyün kimi ol” prinsipi ilə qədəm basmış “Nicat” bu gündən sonra da vəzifəsindən, mövqeyindən asılı olmayaraq millətin mənafeyi ziddinə hərəkət edənləri ciddi tənqid atəşinə tutacaq, cəmiyyətimizdə baş verən hər cür saxtakarlıq faktlarına qarşı özünün etiraz səsini ucaldacaqdır.

 

(Yevlaxda çıxan “Nicat”    qəzetinin

9 iyul 1992-ci il tarixli 22 sayından)